ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើសុំការយោគយល់ពីប្រជាពលរដ្ឋចំពោះការសម្រេចចិត្តរបស់រាជរដ្ឋាភិបាលក្នុងការផ្អាកពិធីបុណ្យភ្ជុំឆ្នាំ២០២១ ដោយថាការសម្រេចចិត្តដ៏លំបាកនេះគឺដើម្បីការពារអាយុជីវិតរបស់ពលរដ្ឋពីជំងឺកូវីដ-១៩ តែប៉ុណ្ណោះ។

ក្នុងសារសំឡេងផ្ញើជូនជនរួមជាតិនៅព្រឹកនេះ សម្ដេចតេជោ ហ៊ុន សែន បានថ្លែងថាស្ថានភាពជំងឺកូវីដ-១៩ ក្នុងឆ្នាំ២០២១ គឺខុសពីស្ថានភាពជំងឺកាលពីឆ្នាំមុន ដោយសារនៅពេលនេះកម្ពុជាកំពុងរងគ្រោះពីព្រឹត្តិការណ៍២០កុម្ភៈនៅមិនទាន់ចប់ ហើយប្រទេសក៏កំពុងញាំញីដោយកូវីដ Delta ថែមទៀត។

សម្ដេចតេជោបន្តថា សម្ដេចពិតជាមិនអាចឱបដៃឈរមើលពលរដ្ឋខ្លួនស្លាប់ដោយសារភាពធ្វេសប្រហែសនោះទេ ទើបសម្ដេចសម្រេចចិត្តដ៏លំបាកឱ្យផ្អាកពិធីបុណ្យភ្ជុំបិណ្ឌនាឆ្នាំនេះ។

សម្ដេចតេជោលើកឡើងថា៖ «ពាក់កណ្ដាលនៃចំនួនវត្តនៅភ្នំពេញសុទ្ធតែមានអ្នកឆ្លងកូវីដ ដូច្នេះបើសិនចាប់ពីបិណ្ឌ៤ រហូតដល់ពេលភ្ជុំ តើសភាពការនេះអន្តរាយខ្លាំងប៉ុណ្ណា? ពិតជាធ្ងន់ធ្ងរមែនទែន ហើយពិតជាមហន្តរាយមួយសម្រាប់សុខភាពសាធារណៈនិងជីវិតរបស់ប្រជាជន។ […] វាលនេះគឺជាវាលដ៏ធំ នេះហើយគឺវាលទី៣ គឺវាលជំងឺរាតត្បាតដែលប្រជាជនយើងត្រូវឆ្លងកាត់ឱ្យខានតែបាន»។

សម្ដេចតេជោបន្តថា ការសម្រេចរបស់សម្ដេចត្រូវបានក្រុមប្រឆាំងមួយចំនួនលើកយកមកវាយប្រហារដោយមិនសមហេតុសមផល តែអ្វីដែលសម្ដេចត្រូវធ្វើនៅពេលនេះគឺ ការសង្គ្រោះជីវិតប្រជាជនសំខាន់ជាងឆ្លើយតបទៅនឹងក្រុមប្រឆាំងទាំងនោះ។

កាលពីថ្ងៃទី២៣ ខែកញ្ញា ម្សិលមិញរាជរដ្ឋាភិបាលកម្ពុជាសម្រេចផ្អាកពិធីកាន់បិណ្ឌ និងភ្ចុំបិណ្ឌ ចាប់ពីបិណ្ឌទី៤ (ថ្ងៃទី២៥ ខែកញ្ញា) រហូតដល់ថ្ងៃភ្ជុំបិណ្ឌ ត្រូវនឹងថ្ងៃទី៧ ខែតុលា ឆ្នាំ២០២១ បន្ទាប់ពីពិនិត្យឃើញថាពលរដ្ឋបានប្រមូលផ្ដុំ និងជួបជុំគ្នានៅតាមបណ្ដាវត្តអារាម ដើម្បីប្រារព្ធពិធីកាន់បិណ្ឌ មិនអាចធានាបានការអនុវត្តត្រឹមត្រូវតាមវិធានការសុវត្ថិភាពផ្នែកសុខាភិបាល ដែលអាចនឹងធ្វើឱ្យកម្ពុជាប្រឈមនឹងការឆ្លងរាលដាលជំងឺកូវីដ-១៩ ទ្រង់ទ្រាយធំនៅទូទាំងប្រទេស។

របាយការណ៍ក្រសួងសុខភិបាលបានឱ្យដឹងថា គិតត្រឹមថ្ងៃ២៣ ខែកញ្ញា ពោលគឺត្រឹមថ្ងៃទី២នៃពិធីបុណ្យភ្ជុំ កម្ពុជារកឃើញករណីឆ្លងជំងឺកូវីដថ្មីចំនួន ៨២២ករណី ដែលកើនឡើងខុសពីថ្ងៃធម្មតាជាង ២០០នាក់៕